ORANJESTAD – Departamento di Impuesto a realisa su prome sessionnan cu varios “Stakeholder” e siman aki den cuadro di Reforma Fiscal 2023, cu un base amplio di gremionan presente. E obhetivo di e encuentronan tabata pa presenta e contexto di e situacion economico/financiero actual y con por pone un fundeshi solido pa resolve esaki a largo plaso segun acuerdonan di Landspakket.
UN SISTEMA DI BELASTING MAS MODERNO
Departamento di Impuesto a realisa un Sentiment Report caminda cu a midi sentimentonan di e Stakeholders invita pa cu e cambio aki den nos sistema di impuesto. Den esaki a haya preguntanan riba kico comerciantenan por spera pa locual ta e reforma fiscal 2023. Di tur reaccion inicial, a conclui cu tur hende kier un sistema mas moderno di belasting, teniendo na cuenta tambe e bienestar general di nos comunidad, e impacto economico como tambe e necesidad pa informacion y discusion. Locual ta bini dilanti generalmente ta participacion den e diseño y implementacion di un reforma fiscal, y tambe percurando pa implementa esaki na un manera exitoso. E prome fasenan di e reunionnan aki a cubri e situacion actual, un analisis financiero, e obhetivonan pa reforma fiscal 2023, aprobacionnan administrativo, y finalmente e roadmap y concepto di reforma.
Manera a wordo comunica anteriormente, Gremionan y Departamento Di Impuesto ta di acuerdo cu mehoracion di cumplimento ta di sumo importancia den nos comunidad.
Ta remarkabel cu cada associacion of stakeholder tin diferente bista of opinion riba e reforma segun nan sector, of specialisacion, pero ta di opinion cu e reformanan lo mester bay man den man cu bahamento di gasto di operacion di gobierno.
DISCUSION RIBA DIFERENTE PUNTO DEN AGENDA
Stakeholders ta desea di mira e cuadro total y no solamente e cambionan proponi riba tereno di incremento di impuesto. Tur e puntonan aki ta puntonan valido cu ta wordo tuma na cuenta segun DIMP y a asegura e gremionan cu lo tin espacio pa un sesion riba e terreno aki tambe. “E informacion aki ta crucial pa evalua e concepto actual y haci ahustenan necesario den bienestar general di nos pais,” Luenne Gomez-Pieters, Director Di Departamento di Impuesto ta expresa. Comprendemento di e diferencia entre un sistema di BBO y BTW tabata un di e puntonan riba agenda pero tambe compensacion di impuesto pa cada contribuyente riba tereno di inkomstenbelasting, loonbelasting, reparatietoeslag, onderstand y bijstand a wordo bon ricibi dor di e participantenan.
Adicionalmente, preocupacionnan di impacto di un sistema di BTW riba elasticidad di consumo turistico a wordo presenta constructivamente caminda cu Aruba lo mester tene cuenta cu factornan externo cu por afecta e poder di compra, mirando cu nos ta importa mayoria di nos productonan. Introduccion di BTW lo mester wordo mira den lus di desaroyonan internacional na Merca y Europa.
Tur “stakeholder” lo wordo invita bek pa un segundo encuentro na unda nan “feedback” lo wordo procesa y unda por presenta e diferente ideanan y calculonan di e reforma fiscal durante un “breakout session.”
Departamento di Impuesto y su team di expertonan fiscal ta reitera cu e reforma fiscal presenta durante e encuentronan aki ta conceptual y ta suheto na evaluacion di contribucion di Gremio y di comunidad henter.